مطلوب ضمير ………………. بقلم محمود رمضان حافظ
عارفين ينقصنا ايه
ينقصنا شعب
عنده ضمير وله كبير
هو الوزير ولا الأمير جابوه منين
ماهو الوزير أخو سهير وابن عم محمدين
وأخته اميره مرات حسن أخو حسين
وأمه زمان كانت تزورنا لما كنا صغيرين
ماهو الوزير يادنيا واحد مننا
بس الحكايه أننا
تاه الوزير
لما الضمير
ضاع مننا
من كان يصدق أن الأخ يخون اخوه
ويقتل أمه وبقرش صاغ يبيع أبوه
والبنت ماشيه فى وسطنا
خايفه تهوب مننا
على جسمها لتنهشوه
وتقول وزير ولا أمير وبتلموه؟؟
وبسالك
هو الوزير ولا الامير
اللى باع لحم الحمير؟؟؟
الحكايه مننا
العيب ده اصله فى طبعنا
لما الضمير غاب مننا
وتقول وزير؟
هو الوزير قال للغنى دوس الفقير؟؟
ولا الصغير مننا فى يوم يهين حتى الكبير؟؟
والكبير لما هانوه بطل يعلم ف الصغير؟؟
ومفيش كبير ومفيش ضمير
يا شعب قوم من كبوتك فاتك كتير
واشترىلك حبة ضمير
وبلاش تقول أن السبب هو الوزير
بلاش نغالط نفسنا
وبلاش كسل وبلاش جنان
ماهو الوزير مننا
واسالو محمود رمضان
#محمود رمضان حافظ
