هاميس خالد فنانة شابة تعمل من الفسيخ شربات..
كتبت: هدينا الإتربي
فن الbody painting أو الرسم علي الجسد والوجه غير منتشر بمصر إلا بشكل نادر جداً علي الرغم من وجود مواهب تجيد هذا الفن ببراعة وإتقان ، وهو عبارة عن رسم الخدع البصرية وبعض الأشكال علي الوجه أو الجسم ،وإستطاعت هاميس أن تتقن هذا الفن وتبتكر وتبدع فيه بشكل يلفت الانظار ويحير العقول كيف أنها تخفي ملامحها بهذا الشكل وتحولها إلي شكل آخر في منتهي الدقة .
س- ممكن تعرفي نفسك أكتر؟
أنا هاميس خالد صبري عندي ٢١ سنه ،من الجيزة.
بدرس في كليه الألسن جامعه عين شمس ، الفرقه التالته قسم اللغه الأسبانيه.
س- متي بدأتي احتراف هذا النوع من الرسم؟وهل كانت لديكي هذه الموهبه منذ الصغر؟
حوالي سنة ونص برسم. كنت برسم من صغري بس مأخدتش الرسم ككارير ليا إلا من سنه ونص وغالباً برسم يومياً من وقتها.
س- كيف إكتشفتي موهبتك؟
إكتشفت موهبتي من وأنا صغيرة بحب الرسم لكن لم أكن ارسم بشكل دائم.
من سنه ونص ابتديت أرسم بشكل مستمر واخدت الرسم مش مجرد هواية ده اكتر حاجة بعملها بشغف وحب في حياتي.
س- عندما بدأتي فن الرسم كيف كانت البداية وماهو النوع الذي بدأتي رسمه؟
أول نوع رسم ابتديت فيه وهو الـ galaxy ، ووصلت فيه لمرحلة الحمد لله كبيرة جداً .
بعد كده اتعلمت رسم البورتريه بكل انواعه ” رصاص ،فحم ،الوان خشب وألوان مائيه ”
بالإضافه إني برسم علي كل حاجه تيشيرتات، ساعات والحيطان كمان ..
س- كيف جاءت لكي فكره الرسم علي وجهك علي الرغم من انها غير منتشره بشكل ملحوظ في مصر؟
انا ماشية في مجال مش موجود في مصر الا بشكل نادر جداً ، فعلا
الفكره جاتلي بالصدفة الباحتة ، كنت قاعده بذاكر جه في دماغي ليه مرسمش علي ايدي زي مابرسم ع الورق ؟ ايه الأزمه ؟ وحاولت انفذ الفكره في البيت ، مكنش حتي معايا اي مواد او ادوات وحاولت استخدم حاجات متوفره عندي في البيت ، ساعتها حولت جلد ايدي بالرسم لعظم ، زي الهيكل العظمي بالظبط ، نزلتها ، لقيت الناس انبهرت وخصوصاً ان الـ body painting مش معروف في مصر الا بشكل نادر جداااااا ، وناس قليله جدا اللي تعرفه ، اتبسطت جداً وقتها وابتديت اقرأ من مواقع انجليش -لان مفيش في مصر ناس بتتكلم عليه تقريباً- ونزلت اشتريت خامات وابتديت االشغل الحمد لله مستمره من وقتها برسم كل يومين غالباً
س- كيف وجدتي ردود الفعل علي هذا النوع من الفن؟
اول ما بدأت اشتغل فيه ناس كتير استغربت وسألوا ايه ده ؟ طب عينك فين ؟ بوقك فين ؟ انتي مستخدمه فوتوشوب ؟
بالتدريج الحمد لله بقي في معجبين للنوع ده ، بالعكس الناس بتستني كل رسمه جديدة ارسمها ، الموضوع بالنسبالي مش مجرد رسم علي ايدي او وشي ، الموضوع شغف ،حب ، تحدي
س- ماهي الخامات التي تستخدميها للرسم؟
الوان عاديه وميك اب.
س- تعلمك لهذا النوع من الرسم كان اجتهاد ذاتي ام من خلال كورسات ؟
لا كان اجتهاد ذاتي بدون اي كورسات ،الانترنت كان هو مقياسي الاول والاخير ، ادخل اتفرج علي فيديوز تعليم من الصفر لحد مانا دماغي كونت افكار بقيت انا اكمل مع نفسي.
س- من كان المشجع لك؟ وهل كان للأهل دور في ذلك؟
اهلي ، الاول مكنش في حد خالص ، كانوا شايفين ان ايه نهايه الموهبة يعني وهستفيد ايه وكل ده ، بعد ماتقدمت وشافوا تعليقات الناس وهم نفسهم انبهروا باللي بعمله بقوا يشجعوني وخصوصا امي.
س- هل فكرتي في العمل من خلال هذا الفن خصوصا وان هذا النوع يساعد جدا في الخدع السينمائيه؟
انا فعليا نازله شغل مع مخرج مسرح وهو كلمني مخصوص لانه شاف شغلي غير ميكب المسرح العادي التقليدي بالعكس شاف ان افكاري والخدع اللي بعملها بالألوان ممكن تخدم شغله والسيناريو.
س- هل ترين ان هذه التجربه سوف تكون مفيده ام في نوع من الخوف قليلا؟
من الطبيعي اني اخاف ليس قلة ثقة ، لا طبعا الحمد لله انا بثق في شغلي كويس جدا ،لكن الخوف احساس طبيعي لازم نحس بيه كل مره ، وحاجه صغيره كده ف الشخص الناجح بيكون اتعود وهو بيعمل شغله لكن لازم يخاف كل مره .. ولكن بنتغلب عليه الحمد لله وبيطلع شغل كويس جداً.
س- هل الرسم ممكن انه ياخذك من دراستك؟
لا ابدا ، الشخص الناجح ناجح ، بيكون ناجح في كل جوانب حياته.
س- هل شاركتي بمسابقات او معارض من قبل؟
لا مشاركتش وده للأسف لان ال body painting مش معرووف في مصر علشان يتعمله مسابقات.
س- هل من الممكن بعض الوقتي ان تشعري بعدم الرغم في الرسم او الملل؟
الموضوع كله في الشغف ، دائماً بقول ” عندما ينتهي الشغف ينتهي كل شئ ” ، الشغف هو اللي بيخلينا نكمل دايماً ، الشغف والحب ف اننا نجرب نتقدم ، الحمد لله لم اصل لانتهاء الشغف واتنمني اني موصلش له خالص.
س- من هو مثلك الاعلي في هذا المجال؟
مثلي الاعلي هو بنت عمتي رسامه حلوة ومشهوره جدا ، ووصلت بالرسم للي هي عايزاه اسمها بسنت القاسم.
س- ماذا تخططي للمستقبل وماتتمني فعله؟ نفسي احترف المجال ده ، لان اي فن عموماً مثل البحر ، ملوش حدود وكل يوم بنتعلم ونزيد فيه اكتر ، نفسي افضل اشتغل علي نفسي حتي اصل بشغلي هوليود مش مصر بس كمان.
ونفسي افتح هنا في مصر جاليري بأسمي ويكون فيه مكان اعلم فيه الـ body painting ، لانه بعيدا عن اني بحبه فهو ممتع جدا شئ جميل انك تعملي خدع بصريه بإيدك وتغيري شكلك مثلا لشخصيه كارتونيه او اي شخص، الموضوع ممتع.
س- ماذا تقولي لكل من لديه موهبه؟
لا ييأس لان اكيد هيسمع تعليقات محبطه كتير في البدايه ، وده طبيعي لان لولا اختلاف الاراء لبارت السلع ، لو عندك حلم ، خليه قدامك ، اعتبر نفسك لا بتسمع ولابتشوف اي تعليق سلبي ، يقفل عينه عن اي شي ممكن يوقفه لحد ميوصل لحلمه..
بعض أعمال الفنانة..
