خبر هام : الدكتور اسماعيل طه محافظ دمياط يكتب :الحق حياتك

الدكتور اسماعيل طه محافظ دمياط يكتب :حدث بالفعل
الحق حياتك ….
كنت نبطشي عنايه مرة..جالي تليفون من تحت من دكتور الطوارئ ان فيه عيان مبعوت من عند دكتور بذبذبه اذينيه ومحتاج مكان فى العناية الفائقة..
انا مكنش عندي مكان خالص فكلمت واحد زميلي فمستشفي تانيه انسق معاه سرير فاضي عشانه..
نزلت للحاله مع ممرضه من العناية كانت نازله معايا تجيب حاجه من الطواريء..اكشف عليه قبل تحويله..كشفت على الراجل لقيته كويس..ضغط وصدر وقلب وكله معقول فيما عدا عدم انتظام فضربات القلب..
الممرضه كانت عملت رسم قلب..كان طبيعي..حتي مافيهوش الذبذبه الاذينيه اللي مبعوت بسببها.. خرجت اكتب جواب التحويل..وانا بكتبه لقيت الممرضه اللي نازله معايا خرجالي بتصوت وبتجري بسرعه فالطرقه ويتشاورلي اني اجي بسرعه..
رحتلها جري..ورتني حته من رسم القلب شكلها كانت متكرمشه ومرميه..الممرضه بتاعه الطواري افتكرتها شخبطه فقطعتها وكورتها ورميتها جنب العيان.. الحته دي كان فيها ضربات قلب بطينيه سريعه وده اختلال خطير جدا فكهربية القلب..ومميت فى أى لحظه..
عملتله رسم قلب تاني..رسم قلب طبيعي تماما بس بيدخل فنوبات متتاليه من الضربات دي.. خدته وطرت بيه ع الرعايه..فى دقيقة كنت فوق.. طبعا بنته ومراته انهاروا..ناس بتجري وانا بزعق وبسقف للعمال يجروا يجيبوا كرسي عشان الحالة تطلع بعد ماكانوا جايين متحولين من عياده والدنيا هاديه..
طلعته العنايه علي تروللي..سرير يعني فى الطرقة كدا وجبتله مونيتور من السرير ده علي جهاز من السرير ده..وجبت جهاز الصدمات الكهربية وادوات انعاش القلب وفضلت جنبه.. الراجل كان ضغطه كويس جدا وكان واعي وكل شويه يسألنى مالك مستعجل كدا ليه وهو بيضحك.. خليت التمريض يدي علاج وريدي للقضاء علي الضربات دي.. منظر الضربان ع المونيتور مرعبه..وبدات تتحول كمان لشكل معين ينذر انه قلبه هيقف فى أى لحظه.. اول ماشوفت المنظر ده..فى اللحظه اللي شوفتها فيها كان قلبه توقف تماما..ودخل فرجفه بطينيه.. في ثانيه خلعت قميصه..جبت الجهاز وشحنته واديته صدمه كهربيه..مارجعش..صدمه تانيه..مارجعش..صدمه تالته.. سبحان الله!! ده الراجل كان داخل علي رجليه وكان بيضحك من ثواني!! الصدمه التالته..رجع قلبه ينبض بشكل طبيعي..والتنفس انتظم..والضربات دي راحت تماما من على المونيتور.. طبعا انا وتمريض الرعايه واقفين حواليه.. شويه وبدا يفتح عينيه..اول ما فتح عينيه قلتله بضحك كدا..”ايه ياحج..حمدلله ع السلامه..كنت حاسس بإيه قولي” طبعا انا بسأله عشان اعرف احساس الصدمه الكهربيه اللي خد منها تلاته دي..
لقيته رد عليا رد عجيب..غير متوقع قالي”حسيت اني ندمت..حسيت اني ندمان” قلتله ازاي؟ قالي انا كنت معاك..فجاه لقيت الدنيا سكتت..ولقيت نفسي فمكان ماعرفوش..حواليا ناس ماعرفهمش وكلهم باصين عليا..يادوب شايفهم بس نظري مش مميز ملامحهم..كاني كنت وسط سحاب او ضباب ابيض..واول ما قربوا مني لقيت نفسي بفتح عينيا قدامك تاني..
الوصف كان لوحده كان كفيل انه يخلينا نتسمر فى مكاننا ومحدش فينا نطق لمده دقايق..انا جسمي قشعر من الوصف..والتمريض كله انهار وبكي.. الراجل ده كان فين!! الراجل ده راح فين وجه منين!! سكتنا..واديتله علاجه..وطلب ينام نيمته وغطيته..وظبطتله علاج وفضلت قاعد جنبه افكر.. سبحان الله!!لو مكنتش الممرضه خدت بالها من رسم القلب..لو الممرضه الأولى رمت حته رسم القلب وماسبتهاش جنبه!! طب لو كان اتحول وركب الاسعاف وهو كدا!! الراجل ده ربنا عاوزه..عاوزله بدايه جديده..عاوزه يقربله..عاوزه يتوب عن حاجه معينه!!
بعد فترة ماشي فالشارع لقيت راجل كدا بيوقفني ويسلم عليا طلع هو..قالي انا مدين ليك مش بس بحياتي..لا بالبدايه الجديده اللي ربنا ارادلي بيها..
قالي انه بيشتغل سواق..وكان كتير بيستغل الناس ويغلي عليهم الاجرة ولو بيلف متأخر يضاعف الأجرة كمان..ومكانش بيتصدق ولا كان بيخرج ذكاة ماله !! دلوقت ماشاء الله..بدأ يحفظ قرأن..بدأ يصلي فى المسجد..وشه نور..بقي انسان تاني!! بعد الموقف ده حسيت قد ايه ان الموت قريب..وإني لازم اقرب من ربنا قدر استطاعتي.. وان دايما ربنا بيسيبلك فرصه ترجعله..وان دايما فيه وقت..وفيه امل تتغير..وان ساعات ربنا بيبعتلك فى طريقك علامات او مواقف تهزك من جواك عشان تتغير..عشان ترجعله..عشان حياتك ماشيه غلط ولازم تفوق..حتي لو كنت عجوز وعندك ميت سنه.. دايما فيه فرصه لبدايه جديده.. بس انت قربله.. ‫#‏ونحن_اقرب_اليه_من_حبل_الوريد‬
‫#‏حدث_بالفعل‬