خبر هام تنفرد : بنشر الجزء الثاني مــن يوميات الفنان” أحمد عماد وهب” أبن كفر سعد فى مستشفى 57357

الجزء التانى
حوار طلال الجمل
شوفت تعامل في المستشفي دي مش شوفته في اي مكان بره سواء من مدير المستشفي للدكاتره للتمريض لموظفي العلاقات للمتطوعين للامن انا مهما اتكلمت عنهم مش هوفيهم حقم ومش هقدر اعبر عن حبي ليهم وللمستشفي
اما بقي ماما وبابا واختي وكل أهلي فكان ليهم دور كبير في رحلة علاجي كانو ديما بيشجعوني ويقووني .. ماما هي اللي كانت معايا ديما نظرا لظروف شغل بابا كنت عارف وحاسس اد ايه هي تعبانه وعلي الرغم من كده مكنتش بتشتكي وديما تقول الحمد لله وديما تقولي انت احسن من غيرك وخليك ديما واثق من كده .. اختي بقي كنت ديما مش بحب اتكلم معاها علي الموبايل لان كنت بحس انها زعلانه بس بمجرد ما تشوفني كانت تقولي انا بستمد قوتي منك يا احمد بصراحه مش عارف مين اللي كان بيستمد قوته من مين بس من الاخر كلنا في البيت كنا بنستمد قوتنا من بعض
قبل ما اتعب مش كان ليا صحاب كتير وكنت ديما منطوي في المدرسه بس لما دخلت 57357 اتصحابت مع أحمد الحديدي متطوع وبقي قريب ليا جدا كنت بحس انه اخويا الكبير ومن هنا اتصحابت علي المتطوعين بقي هما دول صحابي واقرب ناس ليا كانو ديما بيقوني كنت بفرح لما بلاقيهم متجمعين معايا وحواليا وكنت بزعل جداااااااااا لما يمشو او مش اشوف حد فيهم وهما دول كانو سبب قوتي بردو
57357 هي بيتي التاني اللي حسيت فيه بجد ان انا عايش برغم الالم والوجع اللي المفروض بعاني منه
عرفت في المكان ده ناس كتير هي اللي شجعتني ووقفت جنبي في اصعب اوقات في حياتي وبتشجيع كل اللي في المكان ده ليا يمكن مكنتش هوصل للي انا وصلتله
في المكان ده قدرت انمي موهبتي واطلع حاجات كتير حلوه انا ذات نفسي مكنتش متوقع
خلص اول 3 شهور في رحلة علاجي واللي الكيماوي ولما عملت الاشاعات والتحاليل من تاني كانت النتيجة الحمد لله بفضل ربنا وبفضل دعوات كل اللي حواليا كويسه والدكتور قرر اني مش هعمل استئصال وهكمل في الكيماوي فتره مع الاشعاع .. شعري طبعا كان وقع من اول جرعة كيماوي وطبعا كان ليا موال مع المناعه اللي كانت كل شوية تقع بس عادي اقدرت اتخطي كل ده وكنت بلعب وبهزر وبجري وبتنطط وبرسم وفي اخر فتره ليا في العلاج كنت بطلع للاطفال كمان العب معاهم
يعني حياتي موقفتش بالعكس ديما بقول ان حياتي بدأت من جديد في 57357
المرض عمره ما ضعفني بالعكس كنت اقوي من المرض ومن السرطان
واديني الحمد لله خفيت بفضل ربنا وداعوتكم وبفضل مستشفي 57357

انتوا كمان تقدرو تساعدو اخواتى فالمستشفى ممكن تيجوا تزروهم ده اكيد هيفرق معاهم كتير وممكن يبقى ليكوا اصحاب جداد هناك
عايزين كلنا نقف جنب مستشفى 57357 علشان نقدر نحقق ان مفيش طفل ملوش مكان وده هيكون بتبرعاتكم للمشاريع الجديدة اللى هتوفر 300 سرير جداد
الفنان ” أحمد عماد وهب ” أبن كفر سعد بيدعوكم تزورو مستشفي 75357 وتتبرعو علشان نقدر نحقق ان مفيش طفل ملوش مكان بتبرعاتكم للمشاريع الجديدة اللى هتوفر 300 سرير جداد